លោកជំទាវ ម៉ែន នារីសោភ័គ អគ្គលេខាធិការស្តីទី កាកបាទក្រហមកម្ពុជា បានអញ្ជេីញជួបសំណេះសំណាល សួរសុខទុក្ខ និងចែកអំណោយមនុស្សធម៌ ជូនដល់ស្ត្រី ទេីបសម្រាលកូនរួច និងត្រៀមសម្រាលចំនួន ២៣នាក់ នៅមណ្ឌលសុខភាពព្រៃប្រស់ ក្នុងស្រុកកំពង់ស្វាយ ខេត្តកំពង់ធំ
ស្ត្រីទេីបសម្រាលកូនរួច និងត្រៀមសម្រាលចំនួន ២៣នាក់ នៅមណ្ឌលសុខភាពព្រៃប្រស់ ខេត្តកំពង់ធំ សូមថ្លែងអំណរគុណកាកបាទក្រហមកម្ពុជា និងក្រុមការងារឥស្សរជនឆ្នេីមថ្នាក់ជាតិ ដែលបានចុះអប់រំ និងក្រេីនរំលឹកពីសារអប់រំសុខភាព ព្រមទាំងផ្តល់អំណោយមនុស្សធម៌ជួយសម្រាលការលំបាក ...!!
នៅរសៀលថ្ងៃទី ១៩ ខែមករា ឆ្នាំ២០២៤ នេះ លោកជំទាវ ម៉ែន នារីសោភ័គ អគ្គលេខាធិការស្តីទី កាកបាទក្រហមកម្ពុជា និងជាអនុប្រធានអចិន្ត្រៃយ៍ក្រុមការងារឥស្សរជនឆ្នេីមថ្នាក់ជាតិ និងលោកជំទាវ លំ គន្ធារី អនុប្រធានគណៈកម្មាធិការសាខាកាកបាទក្រហមកម្ពុជា ខេត្តកំពង់ធំ បានអញ្ជេីញជួបសំណេះសំណាល សួរសុខទុក្ខ និងចែកអំណោយមនុស្សធម៌ ជូនដល់ស្ត្រីទេីបសម្រាលកូនរួច និងត្រៀមសម្រាលចំនួន ២៣នាក់ នៅមណ្ឌលសុខភាពព្រៃប្រស់ ដែលស្ថិតក្នុងឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ។
ក្នុងឱកាសនោះ លោកជំទាវ ម៉ែន នារីសោភ័គ បានសម្តែងនូវក្តីសោមនស្សរីករាយ និងបានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នេីមថ្នាក់ជាតិ នៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិកឆ្លេីយតបមេរោគអេដស៍ជំងឺអេដស៍ និងការអភិវឌ្ឍនៅកម្ពុជា និងជាឥស្សរជនឆ្នេីមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដេីម្បីសុខភាពស្ត្រីនិងកុមារ ដែលផ្តាំផ្ញេីសួរសុខទុក្ខ និងសារអប់រំសុខភាពស្តីពីអត្ថប្រយោជន៍នៃការមកពិនិត្យផ្ទៃពោះឱ្យបានទៀងទាត់, ពិនិត្យផ្ទៃពោះឱ្យបានយ៉ាងតិច ៤ដង មុនពេលសម្រាល, ការទទួលទានអាហារូបត្ថម្ភ បន្លែធម្មជាតិ ដេីម្បីសុខភាពល្អទាំងម្តាយនិងទារកក្នុងផ្ទៃ, កុំបរិភោគផ្អែមពេក-ប្រៃពេក ដែលអាចបង្កជាជំងឺផ្សេងៗ ដូចពាក្យចាស់ពោលថា «ស្រឡាញ់ខ្លួន ឱ្យស្ងួនចំណី», «ការពារប្រសេីរជាងព្យាបាល», «ញាំអាហារជាថ្នាំ កុំញាំថ្នាំជាអាហារ»ជាដេីម។
ទន្ទឹមនឹងនេះ សូមក្មួយៗបំបៅកូនដោយទឹកដោះម្តាយ ដេីម្បីកូនមានសុខភាពល្អ ធន់នឹងជំងឺផ្សេងៗ, បន្តពិនិត្យសុខភាពក្រោយពេលសម្រាល, ចាក់វ៉ាក់សាំងបង្ការដល់ទារក ចំណែកឯម្តាយត្រូវចាក់វ៉ាក់សាំងបង្ការជំងឺមហារីកមាត់ស្បូន និងជំងឺមហារីកសុដន់ជាដេីម។ ជាមួយគ្នានេះ លោកជំទាវ ក៏បានផ្តាំផ្ញេីដល់ស្ត្រីជាមាតាទាំងអស់ត្រូវរស់នៅមានអនាម័យ ផឹកទឹកឆ្អិន បរិភោគអាហារមានជីវជាតិគ្រប់គ្រាន់ អាហារូបត្ថម្ភត្រឹមត្រូវ និងថែទាំសុខភាពឱ្យបានល្អ។
លោកជំទាវ ក៏បានថ្លែងអំណរគុណចំពោះ ក្រុមគ្រូពេទ្យនៃមណ្ឌលសុខភាពព្រៃប្រស់ ដែលបានយកអស់កម្លាំងកាយចិត្ត មេីលថែទាំប្រជាពលរដ្ឋទាំងអស់ដែលមកទទួលសេវានៅក្នុងមណ្ឌល បានយ៉ាងល្អប្រសេីរ និងប្រកបដោយវិជ្ជាជីវៈត្រឹមត្រូវផងដែរ។
ស្ត្រីជាមាតាទាំង ២៣គ្រួសារ បានថ្លែងអំណរគុណយ៉ាងជ្រាលជ្រៅចំពោះកាកបាទក្រហមកម្ពុជា និងក្រុមការងារឥស្សរជនឆ្នេីមថ្នាក់ជាតិ ដែលបានចុះអប់រំ និងក្រេីនរំលឹកពីសារអប់រំសុខភាព ព្រមទាំងបានផ្តល់អំណោយជួយសម្រាលការលំបាក ដោយក្នុងគ្រួសារនីមួយៗទទួលបាន ៖ អង្ករ ២៥គីឡូក្រាម, អង្ករសុខភាព ២គីឡូក្រាម, មី ១កេស, ត្រីខ ១០កំប៉ុង, ទឹកត្រី ១យួរ, ទឹកស៊ីអ៉ីវ ១យួរ, ឃីត (មុង ភួយ សារុង ក្រមា) ១កញ្ចប់, កន្សែងពោះគោ ១, សាប៊ូដុសខ្លួន ២ដុំ និងថវិកា ២ម៉ឺនរៀល៕
