ឯកឧត្តមសន្តិបណ្ឌិត នេត សាវឿន ឧបនាយករដ្នមន្ត្រី អញ្ជើញចូលរួមព្រឹត្តិការណ៍ប្រកួតកីឡាវាយកូនគោល ពានរង្វាន់សម្តេចតេជោ ហ៊ុន សែន លើកទី៨ អបអរសាទរ ទិវាសន្តិភាពនៅកម្ពុជា ក្រោមអធិបតីភាពដ៏ខ្ពង់ខ្ពស់សម្តេចតេជោ ហ៊ុន សែន
===============
នាព្រឹកថ្ងៃសៅរ៍ ១៣រោច ខែមិគសិរ ឆ្នាំរោង ឆស័ក ព.ស. ២៥៦៨ ត្រូវនឹង ថ្ងៃទី២៨ ខែធ្នូ ឆ្នាំ២០២៤ ឯកឧត្តមសន្តិបណ្ឌិត នេត សាវឿន ឧបនាយករដ្នមន្ត្រី និងជាប្រធានគណៈកម្មការដឹកនាំ បានអញ្ជើញចូលរួមព្រឹត្តិការណ៍ប្រកួតកីឡាវាយកូនគោល ពានរង្វាន់សម្តេចតេជោ ហ៊ុន សែន លើកទី៨ អបអរសាទរ “ទិវាសន្តិភាពនៅកម្ពុជា” ក្រោមអធិបតីភាពដ៏ខ្ពង់ខ្ពស់សម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា នៅទីលានកីឡាវាយកូនគោល ឈុន អូន ហ្គហ្វ រីស៊ត ស្ថិតក្នុងឃុំជ្រៃលាស់ ស្រុកពញាឮ ខេត្តកណ្តាល។

ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី និងជាប្រធានគណៈកម្មការដឹកនាំ បានអញ្ជើញមានប្រសាសន៍ក្នុងពិធីបើកការប្រកួតនោះ វត្តមានដ៏ឧត្តុង្គឧត្តមរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា នាឱកាស ដ៏វិសេសវិសាលនេះ មិនត្រឹមតែបានផ្តល់កិត្តិយសធំធេងបំផុតជូនដល់ កីឡាករ កីឡាការិនី និង ក្រុមការងាររៀបចំប៉ុណ្ណោះទេ ប៉ុន្តែគឺជាការឆ្លុះបញ្ចាំងអំពីអត្ថន័យដ៏ជ្រាលជ្រៅនៃការប្រកួត កីឡាវាយកូនគោលរបស់យើង ពោលគឺដើម្បីអបអរសាទរខួប ២៦ឆ្នាំ នៃការបញ្ចប់សង្គ្រាមស៊ីវិលនៅកម្ពុជា ក្រោមនយោបាយ ឈ្នះ-ឈ្នះ របស់សម្តេចតេជោ និងរឹតតែវិសេសវិសាលបន្ថែមទៀតនោះ នៅឆ្នាំនេះយើងក៏ចូលរួមអបអរជាលើកទី១ នៃ «ទិវាសន្តិភាពនៅកម្ពុជា» បន្ទាប់ពីរាជរដ្ឋាភិបាលសម្រេចកាលពីថ្ងៃទី១ ខែមករា ឆ្នាំ២០២៤ កន្លងទៅ កំណត់ជាផ្លូវការ យកថ្ងៃ២៩ ខែធ្នូ ជា «ទិវាសន្តិភាពនៅកម្ពុជា» រៀងរាល់ឆ្នាំ។

ឯកឧត្តម សន្តិបណ្ឌិត នេត សាវឿន មានប្រសាសន៍ថា ការប្រកួតវាយកូនគោល «ពានរង្វាន់សម្តេចតេជោលើកទី៨» ត្រូវបានបែងចែកជាការប្រកួតចំនួន ២ប្រភេទ ក្នុងនោះរួមមាន ប្រកួតឯកត្តជន ដែលមានកីឡាករ កីឡាការិនីចូលរួមសរុបចំនួន ១២៦នាក់ ស្រី ១២នាក់ ដែលបានចាប់ផ្តើមប្រកួតកាលពីម្សិលមិញ និងប្រកួតជាក្រុមសរុបចំនួន ៧៤នាក់ ចែកជា ១១ក្រុម ដែលនឹងត្រូវចាប់ផ្តើមនាពេលនេះ ជាមួយនឹងមូលបទ «កីឡារស់ក្នុងសន្តិភាព»។

ឆ្លៀតក្នុងឱកាសដ៏វិសេសវិសាលនេះផងដែរ ឯកឧត្តម សន្តិបណ្ឌិត នេត សាវឿន ឧបនាយករដ្ឋមន្ត្រី សូមសម្តែងនូវកតញ្ញូតាធម៌ជ្រាលជ្រៅជូនចំពោះ សម្តេចអគ្គមហាសេនាបតីតេជោ ហ៊ុន សែន ស្ថាបនិក អគ្គមគ្គុទេសក៍ឯក និងប្រតិបត្តិករនយោបាយឈ្នះ ឈ្នះ ដោយសម្តេច បានបិទទំព័រសករាជជូរចត់នៅកម្ពុជា, ផ្ដួលរលំរបបប្រល័យពូជសាសន៍, ទប់ស្កាត់មិនឲ្យរបបព្រៃផ្សៃយង់ឃ្នងវិលត្រឡប់ និងបញ្ចប់សង្គ្រាមស៊ីវិលញាំញីរ៉ាំរ៉ៃនៅកម្ពុជា ដោយបានបើកទំព័រសករាជថ្មីមួយ ជាមួយសុខសន្តិភាព អធិបតេយ្យភាពពេញលេញ ភាពសុខដុមរមនា និងការអភិវឌ្ឍគ្រប់វិស័យ។ កម្ពុជាដែលធ្លាប់តែមានគ្រាប់បែក និងគ្រាប់ផ្លោង តែ ឥឡូវ កម្ពុជា គឺមានតែគ្រាប់ពេជ្រ គឺគ្រាប់ពេជ្រនៃសុខសន្តិភាព និងការអភិវឌ្ឍ។

មរតកនៃសន្តិភាព ដ៏ថ្លៃថ្លារបស់សម្តេចតេជោ គឺជាមរតកដ៏ពិសិដ្ឋមួយរបស់យើងទាំងអស់គ្នា ដែលក្នុងនោះរាជរដ្ឋាភិបាលបន្តវេន ក្រោមការដឹកនាំប្រកបដោយបញ្ញាញាណ, គតិបណ្ឌិត, ភាពប៉ិនប្រសប់វៃឆ្លាត របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានតម្កល់ការងារ «ថែរក្សាសុខសន្តិភាព» ជាទិសដៅអាទិភាពចំបងមិនអាចខ្វះបាន ដោយបានរំលេចយ៉ាងប្រត្យក្ស ក្នុងយុទ្ធសាស្ត្របញ្ចកោណ ដំណាក់កាលទី១ និងកម្មវិធីនយោបាយរបស់រាជរដ្ឋាភិបាល សំដៅធ្វើយ៉ាងណាថែរក្សាឲ្យបានដាច់ខាតនូវសុខសន្តិភាព និងខឿនសន្តិសុខ ស្ថិរភាពសង្គមដោយឈរលើអភិក្រមមុតស្រួច របស់សម្តេចតេជោ គឺ «មានសន្តិភាព ទើបមានការអភិវឌ្ឍ»។

ឯកឧត្តម សន្តិបណ្ឌិត នេត សាវឿន ឧបនាយករដ្ឋមន្ត្រី ក៏សូមជម្រាបជូនអង្គពិធី ផងដែរថា នៅថ្ងៃអាទិត្យស្អែកនេះ សម្តេចធិបតី ហ៊ុន ម៉ាណែត ក៏នឹងអញ្ជើញជាអធិបតី ក្នុងពិធីប្រកួតបាល់ទាត់មិត្តភាពដើម្បីអបអរសាទរ «ទិវាសន្តិភាពនៅកម្ពុជា» នៅពហុកីឡដ្ឋានមរតកតេជោ ជាមួយនឹងអ្នកចូលរួមប្រមាណ ៥ ម៉ឺននាក់ ក្រោមមូលបទ «កីឡារស់ក្នុងសន្តិភាព» ដែលនេះគឺជាសក្ខីភាពមួយ បញ្ជាក់ពីការបន្តថែរក្សាមរតកសន្តិភាពដ៏ថ្លៃថ្លារបស់សម្តេចតេជោ ពីសំណាក់រាជរដ្ឋាភិបាលនីតិកាលទី៧ របស់យើង។

ឯកឧត្តម សន្តិបណ្ឌិត នេត សាវឿន ឧបនាយករដ្ឋមន្ត្រី សូមថ្លែងអំណរគុណដល់ក្រុមការងាររៀបចំការប្រកួតទាំងអស់ ដែលបានខិតខំចំណាយពេលវេលា និងយកអស់កម្លាំងកាយចិត្តរៀបចំនូវព្រឹត្តិការណ៍យើង ដំណើរការដោយរលូន និងជាពិសេសសូមថ្លែងអំណរគុណដល់ អ្នកឧកញ៉ា ហ៊ុន តូ និង អ្នកឧកញ៉ា ឈុន អូន ដែលជាអ្នកចូលរួមឧបត្ថម្ភធំនៃកម្មវិធីប្រកួត ក៏ដូចជា ឯកឧត្តម ឧត្តមសេនីយ៍ អ្នកឧកញ៉ា ឧកញ៉ា និងសប្បុរសជនដទៃទៀត ដែលបានជួយឧបត្ថម្ភគាំទ្រជាថវិកា និងសម្ភារៈនានាដល់ការប្រកួតកីឡាវាយកូនគោល «ពានរង្វាន់សម្តេចតេជោ ហ៊ុន សែន» លើកទី៨ របស់យើងនាឱកាសយើងនាពេលនេះ៕