ឯកឧត្ដមសន្តិបណ្ឌិត សុខ ផល ប្រធានក្រុមការងាររាជរដ្នាភិបាលចុះជួយស្រុកបាណន់ បានអញ្ជើញចូលរួមពិធីបើកព្រឹត្តិការណ៍ សង្ក្រាន្តបាត់ដំបង ២០២៤ ក្រោមអធិបតីដ៏ខ្ពង់ខ្ពស់សម្ដេចក្រឡាហោម ស ខេង
====================
នារសៀលថ្ងៃសុក្រ ៤កើត ខែចេត្រ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១២ ខែមេសា ឆ្នាំ២០២៤ ឯកឧត្ដមសន្តិបណ្ឌិត សុខ ផល រដ្នលេខាធិការក្រសួងមហាផ្ទៃ និងជាប្រធានក្រុមការងាររាជរដ្នាភិបាលចុះជួយស្រុកបាណន់ ខេត្តបាត់ដំបង បានអញ្ជើញចូលរួមពិធីបើកព្រឹត្តិការណ៍ "សង្ក្រាន្តបាត់ដំបង ២០២៤" ក្រោមអធិបតីដ៏ខ្ពង់ខ្ពស់សម្ដេចក្រឡាហោម ស ខេង ឧត្ដមប្រឹក្សាផ្ទាល់ព្រះមហាក្សត្រ និងជាតំណាងរាស្រ្តមណ្ឌលបាត់ដំបង។ សូមជម្រាបថា ដើម្បីរៀបចំព្រឹត្តិការណ៍ "សង្រ្កាន្តបាត់ដំបង ២០២៤" ។

សម្តេចក្រឡាហោម ស ខេង មានប្រសាសន៍ថា ការរៀបចំព្រឹត្តិការណ៍សង្ក្រាន្តបាត់ដំបងឆ្នាំ២០២៤នេះ ពិតជាមានសារៈសំខាន់ណាស់ក្នុងការបង្កើតឱ្យមានភាពសប្បាយរីករាយជូនដល់បងប្អូនប្រជាពលរដ្ឋ ព្រមទាំង ភ្ញៀវជាតិ និងអន្តរជាតិ តាមរយៈការផ្សព្វផ្សាយពីវប្បធម៌ ប្រពៃណីទំនៀមទម្លាប់ដ៏ល្អ ផូរផង់របស់ខ្មែរយើង ដូចជា ការរៀបចំកម្មវិធីសម្ដែងសិល្បៈ, កម្មវិធីប្រគុំតន្រ្តី, កម្មវិធីលេងល្បែងប្រជាប្រិយផ្សេងៗ, ការតាំងពិព័រណ៍ដាក់បង្ហាញផលិតផលនានាជាស្នាដៃ របស់ប្រជាពលរដ្ឋយើងនៅតាមបណ្តាក្រុង-ស្រុកទាំង ១៤ ក្នុងខេត្តបាត់ដំបងទាំងមូល ។ ការតាំងបង្ហាញមុខម្ហូបដ៏ឆ្ងាញ់ពិសាររបស់អ្នកបាត់ដំបង, ការតាំងបង្ហាញចាប៉ីដងវែង ការតាំងបង្ហាញទុរេនយក្ស ការតាំងបង្ហាញណែមយក្ស និងការប្រកួតកីឡាប្រដាល់ គុនខ្មែរ ព្រមទាំងមានកម្មវិធីកំសាន្តផ្សេងៗជាច្រើនទៀត។

ក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរ សម្តេចក្រឡាហោម ស ខេង សូមបួងសួងដល់គុណបុណ្យព្រះរតនត្រ័យ វត្ថុស័ក្តិសិទ្ធិទាំងឡាយក្នុងលោក និងទេវតាឆ្នាំថ្មីព្រះនាម មហោទរាទេវី សូមតាមជួយបីបាច់ថែរក្សា និងប្រសិទ្ធពរជ័យសិរីសួស្តី ជ័យមង្គល បវរមហាប្រសើរគ្រប់ការ ប្រគេន និងជូនចំពោះ ព្រះថេរានុត្ថេរៈគ្រប់ព្រះអង្គ ឯកឧត្តមលោកជំទាវ អស់លោក លោកស្រី យុវជន យុវនារី ភ្ញៀវកិត្តិយស បងប្អូនប្រជាពលរដ្ឋទាំងអស់ ព្រមទាំងអាជ្ញាធរ សមត្ថកិច្ចគ្រប់ជាន់ថ្នាក់ និងសូមបានប្រកបដោយ ពុទ្ធពរដ៏ថ្លៃថ្លាទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕